ЯЩЭНЭРЭ АДЫГЭ ХЭКУ НЫБЖЬЫКlЭ ЛАГЕРЫМ ХЭЛЭЖЬЭНЭУ ФАЕХЭМ ЯТХЫЛЪХЭР КЪАГЪЭХЬЫНХЭ АЛЪЭКӀЫЩТ

Зэнэlосэныгъэм, гъэсэныгъэм ыкlи зыгъэпсэфыным атегъэпсыхьэгъэ «Адыгэ ныбжьыкlэ лагерыр» ящэнэрэу мыгъэ Адраасане - Анталья бэдзэогъум и 29 щегъэжьагъэу шышъхьэlум и 5-м нэс щыlэщт. Ащ хэлэжьэнэу фаехэм яшlоигъоныгъэ тхылъхэр къагъэхьанхэ алъэкlыщт.
 
Мыгъэрэ лагерым иджэпсалъэ «ныбджэгъуныгъэр ыкlи мамырныгъэр». Дунаим ичlыпlэ зэфэшъхьафхэм ащыпсэурэ адыгэ ныбжьыкlэхэр зэрэугъоинхэшъ, ягупшысэхэмкlэ зэхъожьынхэу, lофыгъо зэфэшъхьафхэм атегущыlэнхэу ыкlи зы тхьэмафэм зэгъусэу загъэпсэфынэу – фэдэ пшъэрылъхэр мы лагерым иlэх.
 
Мы лагерэу зэхатщэрэр щэтыр гъэlагъэхэм афэдэу щытыщт. Чlыпlэу Адраасане - Анталья бэдзэогъум и 29 щегъэжьагъэу шышъхьэlум и 5-м щыlэщт.
 
Лагерым ыубытырэ чlыпlэм икъун фэдиз псыунэ, зыгъэпскlыпlэ, электроэнергие, интернет, гъэучъыlалъэ ыкlи гыкlалъэ хэтых.
 
Загъорэ тэр-тэрэу шхыныр тэгъэхьазыры, загъорэ къятагъащэ. Ау пщэрыхьэпlэ-шхапlэр чэщи, мафи зэlухыгъ.
 
«Адыгэ сыхьат» - фэдэ уахътэ лагерым иlэщт. Ащыгъум зэкlэми адыгабзэкlэ тыгущыlэщт, адыгэ орэдхэм тядэlущт. Адыгабзэр зэзгъашlэ зышlоигъохэм фэдэ амал яlэщт. Къэбэртэе-Бэлъкъар къэралыгъо университетым икlэегъаджэу Ашхъот Фаридэ адыгабзэкlэ десэхэр зэхищэщт.
 
Программэм лъэныкъо зэфэшъхьафыбэ хэтыщт. Адыгэ лъэпкъ lэшlагъэхэмкlэ, пщэрыхьанымкlэ егъэджэнхэр щыlэщтых, адыгэ фильмхэр къэдгъэлъэгъощтых. «Адыгэ хэкум - тарихъ чlыгум гъэзэжьыгъэныр» - мыщ къытегущыlэщтых Хъуажъ Фахьри, Хьаткъо Щамис ыкlи Вероника Цибенко. Мэкъэмэ пчыхьэзэхахьэхэр, адыгэ джэгухэр, спорт зэнэкъокъухэр тшlыщтых. Къуашъохэмкlэ зекlохэр зэхэтщэщтых ыкlи Анталья къыщыткlухьащт.
 
Хэку гъэзэжьыным имафэ, шышъхьэlум и 1-м, джыри «хэгъэгу джэгушхо» тшlыщт.
 
Лагерым иажырэ мафэ къуаджэу Елемэ (Къэсэйхьаблэ) тыкlощт. Анталья дэжь адыгэ къоджэ закъоу мы зыр ары ныlэп къэнэжьыгъэр. Антальям иадыгэ хасэ ащ щызэхищэрэ фестивалэу «Хьылыжъу» тыхэлэжьэщт.
 
Нэбгырэ пэпчъы лагерым зыщигъэпсэфыным ыкlи щычэфыным мэхьэнэ ин етэты. Джащ фэдэу нэбгырэ пэпчъы лагерым изэхэщэнкlэ пшъэдэкlыжь гъэнэфагъэ ыштэнэу, ащ изэхэщэн къыхэлэжьэнэу тыфай.
 
Лагерым ухэлэжьэным тефэщтыр $80. Ащ къыхеубытэ цlыфыр пlэу зыхэлъыщтыр, мафэм 3 зэрэшхэщтыр, къуашъомкlэ зекlор, Анталья къызэрэщыткlухьащтыр, Елемэ тызэрэкlощтыр.
 
Лагерым иlэ чlыпlэр гъэнэфагъэ, нэбгыри 150 мэхъу. Ащ къэкlонэу фаехэм ятхылъхэр мэкъуогъум  и 1-м щегъэжьагъэу  къагъэхьынхэ алъэкlыщт ыкlи нэбгырэ пчъагъэр 150-рэ зэрикъоу зэпыдгъэужьыщт.
 
Ежьхэм ящэтырхэр зыlыгъыщтыхэм пэшlорыгъэшъэу макъэ къытарэгъэlу.
 
Лагерым къэкlонэу фаехэм мы тхьапэм якъэбар къыратхэн фай.

https://forms.gle/Krh1SM6bup92aXiz8 
 
Лагерым икъэбар зышlогъэшlэгъонэу, ащ къэкlонэу фаехэм мыщ фэдэ адресымкlэ зыкъытфагъэзэн алъэкlыщт.
 
Телефоныр: 05514193230 - Нэшэ Лӏэпш

WhatsApp: https://linktr.ee/cerkesyagenclik 
 
Электроннэ адресыр: cerkesyagencligikamp@gmail.com
 
Лагерым изэхэщэн къыхэлэжьэнышъ, мылъку lофкlэ lэпыlэгъу къытфэхъунэу фаехэм ар мыщ фэдэ банковскэ счетым къагъэхьын алъэкlыщт.
 
TL: TR 0200 0100 2697 8371 8713 5004
 
USD: TR 7200 0100 2697 8371 8713 5005
 
EURO: TR 4500 0100 2697 8371 8713 5006