Апэрэ шъолъыр зэнэкъокъу «Губзыгъэхэр»зыфиIорэр мы мафэхэм Адыгэ Республикэм и Лъэпкъ музей щы­кIуаг

Апэрэ шъолъыр зэнэкъокъу «Губзыгъэхэр»зыфиIорэр мы мафэхэм Адыгэ Республикэм и Лъэпкъ музей щы­кIуагъ.

Я 8 — 11-рэ классхэм ащеджэхэрэ ныбжьыкIэхэм адыгабзэм, адыгэ культурэм, тарихъым алъэныкъокIэ яшIэныгъэхэр къагъэлъэгъуагъэх.

Зэнэкъокъур мэфитIо кIуагъэ, зэкIэмкIи куп 11 хэлэжьагъ, ахэр Мыекъопэ гурыт еджапIэхэу NN 2-м, 13-м, 5-м, 22-м ыкIи Адыгэ республикэ гимназием якIэлэеджакIох, джащ фэдэу Адыгэкъалэ, Шэуджэн, Кощхьэблэ, Красно­гвардейскэ, Тэхъутэмыкъое ыкIи Теуцожь районхэм къа­рыкIыгъэх. Куп пэпчъ нэбгырэ тфырытф хэтыгъ, зэкIэмкIи кIэлэеджэкIо 55-мэ яшIэныгъэхэр къагъэлъэгъуагъ.

АР-м гъэсэныгъэмрэ шIэныгъэмрэкIэ и Министерствэ, АР-м культурэмкIэ и Минис­терствэ, гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэр, Адыгэ къэралыгъо университетыр Iоф­тхьабзэм изэхэщакIох, шIу­шIэ фондэу «Гухэлъ» зыфи­Iорэр икIэщакIу. Адыгэм инеущрэ мафэ ыгъэгумэкIхэу мы зэнэ­къокъур ахэм рагъэкIокIыгъ.

Зэнэкъокъур адыгэбзэ къа­бзэкIэ едзыгъуищэу гощыгъэу кIуагъэ. Зэнэкъокъум изэфэхьысыжькIэ анахь дэгъоу зыкъэзыгъэлъэгъуагъэр Шэуджэн районым къикIыгъэ купэу «Гугъэр» ары. Щытхъу тхылъхэмрэ сомэ мини 100-рэ ащ хэтхэм афагъэшъошагъ, ятIонэрэ чIыпIэ къыдэзыхыгъэ Адыгэкъалэ къикIы­гъэхэм щытхъу тхылъхэр ыкIи сомэ мин 50 аратыгъ.

Мы зэнэкъокъум шIуагъэ ин зэрэпылъыр къекIолIагъэхэм къыхагъэщыгъ ыкIи амалэу щыIэмкIэ илъэс къэс зэхащэзэ ашIынэу агъэнэфагъ.

ДЕЛЭКЪО Анет.

Къуекъо Марин. ТекIоныгъэр къыдэзыхыгъэхэр джабгъумкIэ щытых.