КIэрэщэ Зэйнаб ( Keraşe Zainab )

БзэшIэныгъэлэжь, профессор, кавказовед цIэрыIоу, адыгэ бзэшIэныгъэм зиIахьышхо хэзышIыхьэгъэ КIэрэщэ Зэйнаб къызыхъугъэр илъэси 100 зэрэхъурэр непэ хэтэгъэунэфыкIы.

Адыгеим ибзылъфыгъэхэмкIэ апэрэу филологие шIэныгъэхэмкIэ доктор ары хъугъэр. ЩытхъуцIэхэу «РСФСР-м шIэныгъэмкIэ изаслуженнэ IофышIэшху», «Адыгэ Республикэм шIэныгъэмкIэ изаслуженнэ IофышIэшху» зыфиIохэрэр къыфагъэшъошагъэх, шIэныгъэхэмкIэ Дунэе Адыгэ Академием идействительнэ членэу щытыгъ.

КIэрэщэ Зэйнаб илъэсыбэрэ гуманитар ушэтынхэмкIэ Адыгэ республикэ институтым Iоф щишIагъ, Адыгэ къэралыгъо университетым щыригъэджагъэх. Адыгабзэм изигъо Iофыгъохэм япхыгъэ научнэ ушэтынхэм ар апылъыгъ, научнэ IофшIэгъи 100-м ехъу къыдигъэкIыгъ. Адыгабзэм изэхэф гущыIалъэрэ адыгабзэм играмматикэрэ зэхэзыгъэуцуагъэхэм ащыщ.

Научнэ IофшIэным дакIоу общественнэ Iофхэми апылъыгъ. Илъэс зэфэшъхьафхэм СССР-м и Апшъэрэ Совет идепутатыгъ, народнэ депутатхэм я Краснодар край, я Адыгэ хэку Советхэм ядепутатыгъ. 

Адыгэ къэралыгъо университетым инаучнэ тхылъеджапIэ КIэрэщэ Зэйнаб иунэе тхылъ зэгъэуIугъэхэр чIэлъых. БзэшIэныгъэмкIэ, диалектологиемкIэ, бзитIушIэныгъэмкIэ, ижъырэ славяныбзэмкIэ, урысыбзэмкIэ тхылъ гъотыгъуаехэр ащ хэлъых. Тхылъ мини 2,1-м ехъу зыхэхьэрэ коллекцием кавказ бзэшIэныгъэм фэгъэхьыгъэхэри хэлъых.

КIэрэщэ Зэйнаб наукэмкIэ кIэн баеу къыгъэнагъэр адыгэ бзэшIэныгъэм иушэтын тапэкIи лъыгъэкIотэгъэнымкIэ лъэпсэшIу зэрэхъущтым уехъырэхъышэнэу щытэп. Зышъхьамысыжьэу зилъэпкъ фэлэжьэгъэ, ащ ыбзэ, итарихъ, икультурэ афэгумэкIыгъэ ащ фэдэ цIыфхэр зыщыдгъэгъупшэхэ хъущтэп, яшIэжь дгъэлъэпIэн фае.