Непэ – Адыгэ Шъуашэм Имаф

Адыгэ Хасэр кIэщакIо зыфэхъугъэ мэфэкIыр илъэс 12 хъугъэу хэтэгъэунэфыкIы. Модельер цIэрыIоу, адыгэ шъошэ хьалэмэтхэр зыдыхэрэ СтIашъу Юрэ къызыхъугъэ мафэм ар тефэ. Юрэ сыфэлъаIо псауныгъэ пытэ иIэнэу, творческэ гъэхъэгъакIэхэр ышIыхэзэ джыри бэрэ щыIэнэу!

Цыемрэ саемрэ адыгэхэм ялъэпкъ lункlыбз, тамыгъэ шъхьаlэу иlэхэм ащыщ. ЯтеплъэкIэ дахэхэу ыкIи пщыгъынкIэ Iэрыфэгъоу зэрэщытхэм елъытыгъэу ижъыкIэ къыщегъэжьагъэу нэмыкl лъэпкъхэри къяхъуапсэхэу, ежьхэми  ящыlэныгъэ щыщ ашlыщтыгъэ. 

Непи хъулъфыгъэ ыкIи бзылъфыгъэ адыгэ шъуашэхэр тищыIэныгъэ изыlахьых. Адыгэ джэгухэм, унэгъо мэфэкIхэм ыкIи нэмыкI зэхахьэхэм ахэр ащыплъэгъун плъэкIыщт.

Типшысэ Iушмэ янэфи пхэтэу,

ПсынкIагъэу пхэлъри – ягухэлъ гугъ.

Узыфадыгъэр сэрыми, хэтми,

Зэрэ Кавказэу дахэу уекIугъ.

                   (МэщбэшIэ Исхьакъ)

Тятэжъ пIашъэхэм яхэбзэ шIагъохэр зэрифэшъуашэу лъагъэкIотэнхэу адыгэ лъэпкъ шъуашэр зэлъягъэшIэгъэным дэлэжьэрэ пстэуми сафэлъаIо. Уилъэпкъ шIу плъэгъун, уитарихърэ уикультурэрэ къэуухъумэнхэ зэрэфаем ятамыгъэу ар ренэу щэрэт!