ТЭ ТЫАДЫГ, ТЭ ТЫЧЕРКЕС!

Лъытэныгъэ зыфэтшӀырэ тилъэпкъэгъухэр!

Урысыер зикъэрэлыгъо цӀыфмэ япчъагъэр агъэнэфэным пае, мы илъэсым ичъэпыогъо мазэм и 15-м къыщыублагъэу шэкӀогъу мазэм и 14-м нэсэу цӀыфытх Ӏофыгъохэр щырекӀокӀыщтых.

КъызэрэхатхыкӀыщт тхылъмэ упчӀакӀомэ ратхэщтыр ежь цӀыфмэ яджэуапхэр арых.

Джэуап зэтыгъэн фае упчӀэмэ ащыщ шъхьадж зыщыщ лъэпкъыр къыгъэнэфэгъэн зэрэфаер.

Тэ:

- Абдзахэхэр,

- Бэслъэныйхэр,

- Бжъэдыгъухэр,

- Еджэркъуаехэр,

- Жанэхэр,

- КӀэмгуехэр,

- Къэбэртаехэр,

- Натыхъуаехэр,

- Мэхъошхэр,

- Хьатикъуаехэр,

- Шапсыгъэхэр,

- Убыххэр - зэкӀэ тызылъэпкъ,  тыадыгэх!

Зэрэдунаеу щыуцугъэ хабзэм тетэу, лъэпкъхэр зэрызэджэжь цӀэрэ нэмыкӀхэм къыфаусыгъэ цӀэрэ яӀэх.

Ащ къыхэкӀэу, ныдэлъфыбзэкӀэ атхырэ лъэпкъыцӀэр ежь лъэпкъыр зэрызэджэжь цӀэр ары, хымабзэкӀэ атхырэр – дунаем къызэрэщашӀэрэр ары.

Урысыем щыпсэурэ лъэпкъхэм ацӀэхэу къэралыгъом ыштагъэхэр ежь къэралыгъуабзэм ишапхъэрэ тхыкӀэхэм тефэрэ цӀэхэр арых. НэмыкӀэу къэпӀощтмэ, мыурыс лъэпкъхэр зэрызэджэжьырэ лъэпкъыцӀэхэр ащ къыдилъытэхэрэп.

Ежь цӀыфытхыр зэрекӀокӀыщтыр адыгабзэп, къэралыгъуабзэ нахь (урысыбз).

Зы лъэпкъэу тыкъызэралъытэщтым мэхьанэшхо иӀ. Ащ пае сыадыг зыӀорэ нэбгырэ пэпчъ зыщыщырэ лъэпкъым ыцӀэ шъыпкъэр къыгъэлъагъозэ, «черкес» ыӀозэ, заригъэтхын фай.

ТиблэкӀыгъэри зы, ти-Хэкури зы, тикъэкӀощтри зы орэхъу! Тэ тыадыг (адыгабзэкӀэ), тэ тычеркес (хымабзэкӀэ).

Тилъэпкъэгъухэр тыкъышъуаджэ мы къэкӀорэ цӀыфытхым «черкес» шъуӀоу зяжъугъэтхынэу!

__________

1. Къэбэртае адыгэ чылэгъо хасэхэм языкIыныгъэм игупчэм итхьэматэу Къалмыкъ Дж.

2. Къэбэртае – Бэлъкъэр Республикэм и хабзэхъумэ Гупчэм итхьэматэу Хьатэжъыкъо В.Н.

3. Къэбэртае-Бэлъкъэр Республикэм ичылэгъо хасэу «Чылабзэм» итхьэматэ Чэмахъо З.

4. «Пэрыт» чылэгъо хасэм итхьэматэ Аскэр (Гюсер А.)

5. Къэбэртае-Бэлъкъэр Республикэм ичылэгъо хасэу «Къэбэртае конгрессым» итхьэматэ Бешто А.

6. «Нарт Хэкум» чылэгъо хасэм итхьэматэ Ашхъот А.

7. Къэбэртае-Бэлъкъэр Республикэм мамырныгъэмрэ зыкIыныгъэмрэ ячылэгъо хасэм итхьэматэ ГубэкIыкI Дж.

8. «ХаБзэ» хасэм итхьэматэ КъуэщIысокъуэ М.